Úr bókinni
Einræður markaðar
Er útrunnin list og eintómt prjál
að íslenska og rita skræður?
Að svara því er minnsta mál:
Markaðurinn ræður.
Fær íslenskan vísan dauðadóm?
Deyðum við málsins glæður?
Margra alda máum út hljóm?
Markaðurinn ræður.
Tóra orð þessa tungumáls
sem tölum við, örfáar hræður?
„Myrkur“, „sólskin“, „rok“ og „frjáls“?
Markaðurinn ræður.
Já, elsku, litla, íslenska þjóð,
ástkæru systur og bræður,
mætti‘ ég senda‘ ykkur, málvinum, ljóð?
Markaðurinn ræður.
(31)