Louisa Matthíasdóttir myndskreytti. 2. útgáfa aukin: Almenna bókafélagið, Reykjavík, 1985.
Úr Hólmgönguljóðum: [brot]
þú
ert fífilbrekka í brjósti mínu
og ég sé augu þín vina mín
í dögg sóleyjanna
brosi fíflanna
og fyrirheiti fjórblaðasmárans
stór opin augu
sem flugu á milli okkar
þar sem við reyndum að vinna bug á stoltinu
flöktandi fiðrildaaugu
sem settust á okkur til skiptis
eins og við værum lokkhærð ljósálfablóm
nýbúin að setja upp rauða skotthúfu
í tilefni af þjóðhátíðinni
en við vorum ekki blóm
heldur forvitnir nátthrafnar
sem híma fyrir utan hvíta hestinn og naustið
meðan nokkur skíma er af tungli
og von í dropa af franskri sól
fra því í hittiðfyrra:
við vissum ekki það væri hægt að gifta þessi augu
sem gerðu strandhögg þegar minnst varði
og rufu kirkjufriðinn í sál okkar
meðan við skáluðum við nóttina
dauðann
hégómann tilgerðina lostann þjáninguna
og sungum með svitaholunum:
ein griðka gerir engan dans
þá komuð þið flúgandi og settuzt í hár mitt
litlu fiðrildaaugu:
eins og lilja meðal þyrna varst þú meðal meyja
eins og mosató á svörtu hrauni
varst þú meðal bargestanna
hár þitt gáraðist eins og rekstur á fjalli
og hendurnar titruðu eins og greinar
nýkomnar í græna laufkápu
og ég hljóp út úr nóttinni
dauðanum
hégómanum tilgerðinni lostanum og þjáningunni
flóttamaður og leitaði hælis í líkama þínum
fjórblaða líkama þínum
meðan drottinn lagði svarta grímu á andlit borgarinnar
og jörðin svaf úr sér vímu gærdagsins
(s. 60 - 62)