Safn ljóða úr fyrri bókum höfundar.
Úr Landinu í brjóstinu:
Landið í brjóstinu
(úr Á hvítri verönd, 1988)
Oft er erfitt
að bera landið í brjóstinu
brimsorfið og veðrað
fátt um afdrep
Jökulkróna þess er þung
hjartað brennandi
birtan skær og nóttin löng
Sagan eins og samgróningur
í brjóstinu
Suma morgna
er sagan og landið
sterk frjáls og gagnsæ
í brjóstinu
Hamskipti
(úr Leiðin heim, 1975)
Svefn
sem flögrar yfir höfði mér
styttu vökuna
Breið væng þinn á augu mín
Leyf mér hamskiptin
Ljá mér leiðsögn þína
uns aftur morgnar
Fús teyga ég óminnisdrykkinn
er þú að skilnaði berð mér
Samtöl við nóttina
(úr Einnota vegur, 2003)
Vindurinn kemur vafrandi
með reifabarn í fangi
Gærdagurinn gróin rúst
Ungur morgunn
er óðara fullvaxinn
Þú dregur niður rúðuna
Dagurinn er floginn
Í kvöld lætur tunglið
klæði sín falla á jörðina
Gættu hvar þú stígur