Um bókina
Ort er um hinar ýmsu vistarverur innra með manneskjunni sem og úti í hinum stóra heimi og dregnar eru upp myndir sem eru í senn margræðar og skemmtilega óvæntar. Höfundur hefur áður sent frá sér skáldsögu og fræðirit en hér er á ferð önnur ljóðabók hans og fyrir hana hlaut hann Ljóðaverðlaun Tómasar Guðmundssonar 2018.
Úr bókinni
Hrundar borgir
I.
er
nokkuð
fegurra en
yfirgefið mannvirki
úr steinsteypu?
svartir ferhyrningar
sem gapa upp í vindinn
þakið af
þetta er höfuð
opið fyrir hverju því
sem fellur ofan af himnum
en þetta höfuð er tómt
því það er ekkert á himnum
nema hendur sem sáldra regndropum
úr greipum sér
líkamslausar mjúkar hendur
sem þrá það eitt
að strjúka
hrjúfa
steypu
og finna
þar líf